Afa Sa

Belun sira imi rona ona Afa sa ka lae, hau sente imi rona tiha ona, Tamba Amo Bispo Belo mai husi suco nee, duni. Afasa suco ida nebe administrativa relijiogo nian partensia ba Parokia Laga maibe iha parte administrasaun guverno nian partensia ba sub distrito Quelicai. Afa sa mai husi lian Makasae katak Afa = Fatuk, sa/sar = Maran.
Afa sa katak fatuk maran. Quelicai antigo tempo Portugues nian, uluk hari iha suco nee. La iha istoria barak mak Portugal husik hela hanesan recordasaun ba Quelicai Antigo, maibe so iha deit moru abrigo nebe modifika ba fatin escola do reino nebe oras nee abandona hela sai hanesan sasin mudo katak mumento neba Portugues sira mos hela iha suco refere.
Populasaun suco Afasa balun la hatene tambasa mak Quelicai iha Suco Afasa muda ba Quelicai ida agora hanesan postu administrasaun foun.
Iha tempo okupasan Indonesia nian Suco Afasa sai alvo ba Forca Indonesia nian no tama iha linha mean tamba fatin nee sai hanesan baze forte kaisa klandestina. Afasa halo naran morin TL nian iha Mundo, liu husi Laureado Nobel da Pas 1996 Amo Bispo Don Carlos Ximenes Belo.

Atu ba iha Suco Afasa tenki lao ain ho distansia mais ou menus kilometro 15 husi centro kapital sub distrito Quelicai no Sub Distrito Laga tamba kondisaun estrada nebe ladiak. Maibe iha tempo bai loron ita bele ba ho motor nomos kareta pribadu tamba la iha asesu ba kareta publico.

Produsaun prinsipal suco nee nian mak fehuk midar. Difisil oituan atu hetan be moos iha suco refere. Suco nee sai izolado wainhira tempo udan to’o tamba la iha aseso estrada nebe diak. Oinsa bele dezemvolve suco ida nee atu hanesan mos ho suco seluk iha sub distrito Quelicai. Duarte Ximenes nudar Afasa oan, nebe oras nee asume kargo chefe do soco Afasa hateten katak nia sei esforso an hamutuk ho populasaun Suco Afasa tomak bele rezolve problema hotu nebe suco infrenta.

Duarte Ximenes, moris iha Suco Afasa iha loron 06 Outobro 1972. Duarte nudar Oan dahuluk husi maun alin nain haat nee mai husi domin Darius Ximenes, no Eujenia Ximenes.
Kaben ho Joanina Jacinta Gaio nebe oras nee hanesan dona da casa. Aman husi oan nain neen nee, hetan fiar sai chefe do Suco. Antes ne la iha mehi ida atu sai chefe do Suco. molok sai hanesan Chefe do Suco, Duarte kiik nebe gosta toka no kanta nee hakarak sai Educador, maibe mehi hela mehi deit tamba tenki asume kargo chefe do suco hafoin eleito hanesan chefe do suco. Duarte hahu ninia eskola primaria iha Eskola Publico no 4 Buruma 1981. hafoin nee kontinua eskola pre-secundaria publico no 2 Tirilolo iha Baucau no secundaria publico no 2 Baucau. Remata eskola sekundaria iha tinan 1993 Duarte kontinua ninia estudu iha banku universitario nian maibe tamba ekonomia familia nebe la ajuda, Duarte tenki to’o deit iha semester sinku iha departementu lingua Inglesh Fakuldade siensia da Educasaun ha FKIP UNTIM mumento neba.. Maske la sai hanesan educador maibe tamba nudar foin sae ida husi suco laran nebe mumento nee iha talenta diak hetan konfiansa husi populasaun Suco Afasa hodi chefia suco refere.

Foinsae Duarte mumento neba activu mos iha klandestina, maibe hanesan estudante universitario no resimen mahasiwa ka Menwa nia sempre uza trik atu bele ses husi presaun militar wainhira ferias ba iha ninia suco. Duarte mos hateten maske involve an iha resimen mahasiswa no caixa clandestina nia la iha hanoin ida atu sai hanesan liman kroat ka lutu nasaun nian.

Rona nain sira eix resimen mahasiswa nemos hetan Difikuldade hanesan ema nebe foun ba kargo chefe do suco nian , Duarte Ximens haktuir ninia sentimentu iha momentu neba wainhira hetan fiar lidera suco Afasa. Mane ho fitun Libra nemos hateten durante hamutuk ho populasaun sira nia sente orgulho tamba komunidade sira hakslok ho ninia lideransa, maibe iha futuru Duarte hateten iha ona kaderizasaun ba foinsae sira atu bele chefia hikas suco Afasa to’o mandato to’o nia nebe sei remata iha marso 2009. No hanesan nasaun demokratiko ema ema hotu tenki hakruk ba desizaun povu nian.

Leitor sira, Duarte hateten mos hateten nia sei kontinua hato’o ejijensia ba autoridade lokal iha sub distrito no autoridade nasional atu bele ajuda Suco Afasa nebe infrenta difukuldade boot iha area be mos, nebe fo impakto mos natar no to’os sai abandona iha tempo bailoron tamba la iha Irigasaun nebe diak nomos sistema halo natar nebe tradisonal. Nee duni presiza apoio husi guverno.